فنزويلا كانت في يوم من الأيام واحدة من أغنى دول أمريكا اللاتينية عندها أكبر احتياطي نفط في العالم تقريبا وكانت بتصدر بمليارات الدولارات وشعبها عايش من خير البترول.
النهارده؟ اقتصادها شبه واقف، عملة منهارة، كهربا بتقطع، بنزين مش موجود في بلد بتعوّم على نفط، وملايين هاجروا.
إيه اللي حصل؟ وهل فعلا ترامب قفل فنزويلا؟
ترامب ما دمّرش فنزويلا لوحده بس ضربها في المكان الوحيد اللي كانت لسه واقفة عليه: البترول.
فنزويلا اقتصادها كان قائم على حاجة واحدة تقريبًا: النفط.
أكتر من ٩٠٪ من دخل الدولة من التصدير كان من البترول.
يعني ببساطة: لو البترول وقف الدولة تتخنق.
وده اللي حصل.
في الفتره 2017–2019 إدارة ترامب فرضت عقوبات قاسية جدا على فنزويلا أهمها:
منع الحكومة الفنزويلية من بيع النفط في السوق الأمريكي (وهو كان أكبر مشتر للنفط ).
تجميد أصول شركة النفط الحكومية الفنزويلية PDVSA في الخارج.
منع أي شركة أمريكية أو حتى أجنبية تتعامل بالدولار إنها تشتري نفط من فنزويلا.
معاقبة أي شركة تحاول تتحايل.
يعني مش بس أمريكا اللي بطلت تشتري
أمريكا خوّفت العالم كله يشتري.
وده خلى: التصدير ينهار العملة الصعبة تختفي
الحكومة تفقد قدرتها تستورد أكل ودواء وقطع غيار
وسلسلة الانهيار تبدأ
الضغط ده كان قاتل لأن الدولة كانت أصلاً ضعيفة إداريا فيها فساد وسوء إدارة واعتماد كامل على النفط.
فلما ترامب قفل الحنفية الوحيدة اللي بتدخل دولارات: الاقتصاد وقع زي بيت من ورق.
مش بس الحكومة اتأذت الشعب كله اتأذى.
الناس فقدت شغلها، أسعار السلع طارت، التضخم بقى جنوني، المرتبات بقت بلا قيمة.
ترامب كان هدفه السياسي واضح: إسقاط نظام مادورو أو إجباره يغير سلوكه السياسي.
بس الوسيلة كانت اقتصادية بحتة: خنق البلد ماليا لحد ما الشعب يثور أو النظام يقع.
وده نوع من الحروب الحديثة: مش دبابات لاء عقوبات اقتصادية على طول الخط.
طب هل العقوبات نجحت؟
●سياسيا؟ لأ. النظام لسه موجود.
●اقتصاديا؟ آه نجحت في تدمير الاقتصاد.
●إنسانيا؟ كانت كارثة.
وده بيفتح سؤال أخلاقي كبير: هل مسموح تضرب اقتصاد دولة كاملة علشان تغير نظامها السياسي؟ بدون اي اعتبارات انسانية
وده بيفكرنا دايما ان تنوع المصادر الاقتصادية ضرورة حتميه مش بس لدولة لا حتي الأفراد افتكر دايما المثل الاقتصادي البلدي اللي دايما بنردده ماتحطش البيض كله في سله واحده
